మహబూబ్నగర్ జిల్లా జడ్చర్ల మండల పరిధిలోని నెక్కొండ గ్రామంలో దుందుభి నదిపై నిర్మించిన చెక్ డ్యామ్ తెగిపోయి ఏడాది దాటుతున్నా అధికారులు పట్టించుకోకపోవడంపై స్థానిక రైతులు తీవ్ర ఆవేదన వ్యక్తం చేస్తున్నారు.గతేడాది కురిసిన భారీ వర్షాలకు దుందుభి నది ఉధృతంగా ప్రవహించింది. ఈ ఉధృతికి నెక్కొండ చెక్ డ్యామ్ పూర్తిగా తెగిపోయింది. చెక్ డ్యామ్ దెబ్బతినడంతో నదిలో వర్షపు నీరు ఏమాత్రం నిల్వ ఉండకుండా వృథాగా దిగువకు కొట్టుకుపోతోంది. ఫలితంగా ఆ ప్రాంతంలో భూగర్భ జలమట్టం భారీగా పడిపోయింది. చుట్టుపక్కల పొలాల్లోని బోరుబావుల్లో నీటి లభ్యత పూర్తిగా తగ్గిపోవడంతో పంటలు ఎండిపోయే పరిస్థితి వచ్చిందని రైతులు ఆందోళన చెందుతున్నారు.ఈ నెక్కొండ చెక్ డ్యామ్ను తక్షణమే పునరుద్ధరించాలని రైతాంగం డిమాండ్ చేస్తోంది. ఇక్కడ మళ్లీ నీటిని నిల్వ ఉంచగలిగితే, దుందుభి నది తీరాన ఉన్న సుమారు 10 నుంచి 15 గ్రామాల రైతులకు ఎంతో మేలు జరుగుతుందని వారు పేర్కొంటున్నారు. చెక్ డ్యామ్ నిర్మాణంతో భూగర్భ జలాలు పెరిగి, బోర్లలో నీళ్లు సమృద్ధిగా లభిస్తాయని చెబుతున్నారు.పాలకులతో పాటు సంబంధిత నీటిపారుదల శాఖ (ఇరిగేషన్) అధికారులు త్వరితగతిన స్పందించి, యుద్ధప్రాతిపదికన ఈ చెక్ డ్యామ్ మరమ్మతులు చేపట్టాలని నెక్కొండ మరియు పరిసర గ్రామాల రైతులు కోరుతున్నారు.