జడ్చర్ల మార్కెట్ యార్డులో మొక్కజొన్న రైతుల గోస ప్రభుత్వ నిర్లక్ష్యంపై బీజేపీ ఆగ్రహం మహబూబ్ నగర్ జిల్లా జడ్చర్ల మండలం స్నేహ ఇండస్ట్రియల్ సమీపంలోని మార్కెట్ యార్డులో మొక్కజొన్న రైతుల పరిస్థితి దయనీయంగా మారింది. ఆరుగాలం కష్టపడి పండించిన పంటను అమ్ముకోవడానికి రైతులు దినదిన గండంగా గడపాల్సి వస్తోంది. ప్రభుత్వం కొనుగోలు ప్రక్రియలో చూపిస్తున్న జాప్యం మరియు నిర్లక్ష్యం వల్ల రైతులు తీవ్ర ఆవేదన వ్యక్తం చేస్తున్నారు.ఈ సమస్యపై సమాచారం అందుకున్న స్థానిక బిజెపి నాయకులు మార్కెట్ యార్డును సందర్శించారు. క్షేత్రస్థాయిలో రైతులు పడుతున్న ఇబ్బందులను అడిగి తెలుసుకున్నారు.పంట పండించడం ఒక ఎత్తయితే, దానిని మార్కెట్లో అమ్ముకోవడం రైతులకు రెండింతల కష్టంగా మారింది.ప్రభుత్వం తక్షణమే స్పందించి కొనుగోలు కేంద్రాలను పూర్తిస్థాయిలో నడిపించాలని బీజేపీ నాయకులు డిమాండ్ చేశారు.పండించిన పంట మార్కెట్ యార్డులోనే వర్షానికి తడిసిపోతుందని, మద్దతు ధర లభించడం లేదని రైతులు ఆవేదన చెందుతున్నారు.ఈ సందర్భంగా బీజేపీ నాయకులు మాట్లాడుతూ, అన్నదాతను ఆదుకోవడంలో ప్రభుత్వం విఫలమైందని విమర్శించారు. రైతుల కష్టానికి తగిన ఫలితం దక్కేలా వెంటనే చర్యలు చేపట్టాలని, లేనిపక్షంలో పెద్ద ఎత్తున పోరాటం చేస్తామని హెచ్చరించారు.
