మహబూబ్నగర్ జిల్లా, జడ్చర్ల మండలంలోని ప్రముఖ పుణ్యక్షేత్రమైన గంగాపురం శ్రీ లక్ష్మీ చెన్నకేశవ స్వామి దేవాలయ అర్చ్ (కమాన్) పునర్నిర్మాణానికి దేవస్థాన కమిటీ సన్నాహాలు చేస్తోంది.గత కొన్ని నెలల క్రితం అధిక లోడుతో వచ్చిన ఒక లారీ నియంత్రణ కోల్పోయి ఢీకొట్టడంతో, ఈ చారిత్రాత్మక ఆలయ ప్రవేశ కమాన్ పూర్తిగా కూలిపోయిన సంగతి తెలిసిందే. ఈ ప్రమాదంపై భక్తులు, స్థానికులు తీవ్ర విచారం వ్యక్తం చేశారు.
ఈ నేపథ్యంలో, ఆలయ కమిటీ పాత కమాన్ స్థానంలో సరికొత్త, అత్యంత వైభవవంతమైన ప్రవేశ ద్వారాన్ని నిర్మించాలని నిర్ణయించింది. ఆలయానికి వచ్చే భక్తులకు ఆధ్యాత్మిక అనుభూతిని కలిగిస్తూ, ఘన స్వాగతం పలికేలా ఈ నూతన నిర్మాణ నమూనాను రూపొందిస్తున్నారు. ఆలయ పూర్వ వైభవాన్ని ప్రతిబింబించేలా, ఆధునిక హంగులతో కూడిన ప్రవేశ ద్వార నిర్మాణ పనులను త్వరలోనే ప్రారంభించేందుకు కమిటీ సభ్యులు ముమ్మర ఏర్పాట్లు చేస్తున్నారు.